وفاقی وزیر منصوبہ بندی احسن اقبال نے امن، استحکام اور پالیسیوں کے تسلسل کو ترقی کی بنیادی شرط قرار دیتے ہوئے کہا ہے کہ شدت پسندوں کی نظریں بلوچستان کی معدنیات پر ہیں، صوبے میں ترقیاتی منصوبوں کے آغاز کے بعد شدت پسندی میں اضافہ ہوا، پاکستان مخالف قوتیں بیانیہ کی جنگ لڑ رہی ہیں، فیک نیوز سے معاشرے میں انتشار پھیلایا جا رہا ہے، بلوچ طلباء ہمارے مہمان ہیں، پاکستان دشمن قوتوں کے عزائم ناکام بنانا ہم سب کی ذمہ داری ہے۔
یونیورسٹی آف نارووال کے بلوچ طلبا سے گفتگو کرتے ہوئے احسن اقبال نے کہا کہ خوشی ہے کہ آپ نے یونیورسٹی آف نارووال کا انتخاب کیا، ہمارے لئے آپ کی حیثیت طالبعلم کیساتھ ایک مہمان کی ہے کہ آپ بلوچستان سے آئے ہیں۔
انہوں نے کہا کہ بلوچستان ایک اہم اور حساس صوبہ ہے، پاکستان کیخلاف قوتیں خیبرپختونخوا اور بلوچستان کے ذریعے ہم پر حملہ اور ہیں، پاکستان کی ترقی بلوچستان کے ساتھ جڑی ہوئی ہے، بلوچستان میں بدامنی میں شدت اس وجہ سے ہے کہ حکومت نے بلوچستان میں ترقی کے منصوبوں پر عمل شروع کیا ہے۔
انہوں نے کہا کہ بلوچستان کی سب سے بڑی طاقت اس کی معدنیات ہیں، معدنیات کی ترقی کیلئے جب ہم نے قدم اٹھائے تو ادھر سے شدت پسندی شروع ہو گئی، شدت پسندوں کی نظریں معدنیات پر ہیں، وہ چاہتے ہیں کہ اس علاقے کو وہ اپنی دسترس میں لے کر آئیں۔
انہوں نے کہا کہ آج کے دور میں جنگ کا پہلا زینہ بیانیہ کی جنگ ہے، گولی کی جنگ آخر میں ہوتی ہے، پہلے کوشش ہوتی ہے بیانئے کے ذریعے لوگوں میں انتشار پیدا کرو، شدت پسندی کا طریقہ ہے کہ لوگوں میں بد اعتمادی پیدا کرو ان کو آپس میں لڑائی۔
انہوں نے کہا کہ جب کسی معاشرے میں عدم استحکام آتا ہے تو وہ خود بخود اندر سے کھوکھلا ہو جاتا ہے، ہمارا فرض ہے کہ ہم ان چیزوں سے باخبر ر ہیں، آج دنیا میں سوشل میڈیا پر فیک نیوز سے آگ لگا دی جاتی ہے، ہم نے جب سی پیک شروع کیا اس کے خلاف منظم طور پر مہم چلائی گئی، جھوٹے نقشے پھیلائے گئے تاکہ پاکستان اور چین کہیں آپس میں جڑ نہ جائیں۔
وفاقی وزیر نے کہا کہ پاکستان اور چین کی دشمن قوتیں چاہتی تھیں کہ سی پیک کے منصوبے کو ناکام بنایا جائے، 2017ء میں چین کی ہر بڑی کمپنی پاکستان پہنچ گئی تھی، اگر 2018ء میں پی ٹی آئی حکومت نہ آتی تو ملک میں کم از کم 25، 30 ارب ڈالر کی سرمایہ کاری ہونا تھی مگر سرمایہ کار دوسرے ممالک چلے گئے اور ہم منہ تکتے رہ گئے۔
انہوں نے کہا کہ ہم اس دھرتی کو پھر سے بسانے کی ہم کوشش کر رہے ہیں، اللہ تعالی نے معرکہ حق میں ہمیں بے مثال کامیابی دی ہے، معرکہ حق نے دنیا میں پاکستان کا طاقت کا توازن بھارت کے اگر اوپر نہیں تو برابر لا کے کھڑا کیا ہے، آج دنیا ہمیں بھارت سے کسی طرح کمتر نہیں دیکھ رہی۔
انہوں نے کہا کہ اب ہمیں معرکہ حق کے بعد معرکہ ترقی جیتنا ہے، معرکہ ترقی جیتنا تبھی ممکن ہوگا جب ہم ملک کے اندر امن رکھیں گے۔
انہوں نے کہا کہ اگر ہم نے ترقی کرنی ہے تو سب سے پہلی شرط امن ، استحکام ، پالیسوں کا تسلسل ہے، آپ کا فرض ہے کہ اپنے علاقے میں لوگوں امن کا شعور دیں، لوگوں کو بتائیں کہ بدامنی سے ہم بہت پیچھے رہ جائیں گے۔
وفاقی وزیر نے کہا کہ ہمیں ملک میں استحکام، انسانی وسائل، تعلیم، ٹیکنالوجی پر توجہ دینی ہوگی کیونکہ جس ملک میں جنگ و جدل ہوگا وہاںکوئی سرمایہ کاری نہیں کرتا۔
