وزیر اطلاعات سندھ شرجیل میمن نے کہا ہے کہ کراچی میں 7.66 ارب کے 9 بڑے منصوبے جاری ہیں جبکہ مجموعی ترقیاتی سکیمیں 756 تک پہنچ گئی ہیں، 167 ارب روپے کا کراچی واٹر اینڈ سیوریج فیز ٹو شہر کے پرانے نظام کی مکمل تجدید کرے گا۔
میڈیا سے گفتگو کرتے ہوئے شرجیل میمن نے کہا کہ کراچی میں شہری ترقی کیلئے متعدد بڑے منصوبے تیز رفتاری سے جاری ہیں۔
انہوں نے بتایا کہ شہر میں 9 بڑے منصوبے 7.66 ارب روپے کی لاگت سے مکمل کئے جا رہے ہیں، کے ڈی اے کے 76منصوبے 13.22 ارب روپے میں جاری ہیں، جبکہ کے ایم سی 200 منصوبوں پر 18.36 ارب روپے خرچ کر رہا ہے۔
انہوں نے بتایا کہ کے ڈبلیو اینڈ ایس سی اور لیاری ڈویلپمنٹ اتھارٹی بھی متعدد منصوبوں پر کام کر رہی ہیں، حب کینال اور ڈملوٹی پانی کی پائپ لائن پروجیکٹ ایک سال کے اندر مکمل ہوں گے اور ڈی ایچ اے کو 10ایم جی ڈی پانی فراہم کریں گے۔
شرجیل میمن نے بتایا کہ غیر ملکی مالی معاونت سے کراچی واٹر اینڈ سیوریج سروسز امپروومنٹ پروجیکٹ میں مرحلہ اول 25.47 ارب روپے کی لاگت سے مکمل ہو رہا ہے اور مرحلہ دوم 167.10 ارب روپے میں کراچی کے پرانے پانی اور سیوریج نظام کی تجدید کرے گا۔
انہوں نے کہا کہ سندھ حکومت تعلیم کے شعبے میں بھی نمایاں اقدامات کر رہی ہے۔
موجودہ مالی سال میں 130سکیموں کے تحت 1,280تعلیمی یونٹس کی تکمیل پر کام جاری ہے، جس پر تخمینہ لاگت 15.57ارب روپے ہے اور 1.88ارب روپے پہلے ہی جاری کیے جا چکے ہیں جبکہ سیلاب متاثرہ سکولوں کی بحالی کیلئے 30 اضلاع میں 12.33 ارب روپے کی سرمایہ کاری کی جا رہی ہے، جاپان کے بین الاقوامی تعاون ادارہ جے آئی سی اے کے پروگرام کے تحت پانچ اضلاع میں 20 لڑکیوں کے سکولوں کو پرائمری سے الیمنٹری سطح تک ترقی دی گئی ہے۔
انہوں نے بتایا کراچی کیلئے 2025-26 ء کے ترقیاتی منصوبے 756سکیموں پر مشتمل ہیں جس میں 713جاری، 17کیری فورورڈ اور 43نئی سکیمیں شامل ہیں۔
