اسرائیل کی جانب سے غزہ میں جنگ بندی معاہدے کی مسلسل دھجیاں اڑائی جارہی ہے اور مختلف علاقوں میں معصوم فلسطینیوں کیخلاف کارروائیاں تھمنے میں نہیں آرہی ہیں۔
جمعہ کے روز اسرائیلی فورسز کی غزہ سٹی، بیت لاہیا اور خان یونس کے علاقوں میں تازہ کارروائیوں کے دوران فضائی حملے کیے گئے جبکہ توپ خانے سے شدید گولہ باری کی گئی جس میں دو بچے شہید ہوگئے ہیں جبکہ غزہ میں ایک اجتماعی قبر سے 51 لاشیں بھی برآمد ہوئی ہیں۔
غیر ملکی میڈیا کے مطابق مغربی کنارے میں بھی صورتحال سنگین ہو گئی جہاں قابض اسرائیلی فوج نے گولیاں مار کر 2 بچوں کو شہید کردیا، کارروائی کے دوران کئی شہری زخمی ہوئے اور علاقے میں گھر گھر تلاشی لی گئی۔
خان یونس سے اسرائیلی یرغمالی کی لاش بھی نکالی گئی ہے جسے آج اسرائیل کے حوالے کیا جائیگا۔
غزہ سول ڈیفنس کے مطابق اب بھی درجنوں خاندان تباہ شدہ گھروں کے ملبے تلے دبے ہوئے ہیں، محدود مشینری اور شدید تباہی کے باعث ریسکیو ٹیموں کو ملبہ ہٹانے میں شدید مشکلات پیش آرہی ہیں۔
دوسری جانب اقوام متحدہ کے سیکرٹری جنرل انتونیو گوتریس نے غزہ جنگ بندی معاہدے کو انتہائی نازک قرار دیتے ہوئے فریقین سے مکمل احترام کی اپیل کی ہے تاکہ امن کی بحالی ممکن ہو سکے۔
