صبا قمر اور عثمان مختار کے ڈرامے پامال کی حالیہ قسط میں دکھائے گئے بولڈ مناظر نے سوشل میڈیا پر طوفان کھڑا کردیا اور صارفین کی بہت بڑی تعداد نے سخت ردِعمل دیتے ہوئے لکھا کہ کوئی تو صبا قمر کی شادی کروا دے، ڈائریکٹر کو شرم آنی چاہئے، یہ پاکستانی ڈرامہ ہے یا بھارتی شو؟، کئی صارفین نے شکایت کی کہ اب ڈراموں میں غیر ضروری بولڈ مناظر دکھائے جا رہے ہیں، کیا اب ہم یہ ڈرامے فیملی کیساتھ بیٹھ کر دیکھ بھی سکتے ہیں یا نہیں؟ ایک صارف نے طنزیہ انداز میں لکھا شکر ہے میرے والد اس وقت ساتھ نہیں بیٹھے تھے ورنہ یہ منظر دیکھنا بہت مشکل تھا۔
ایک صارف نے لکھا صبا قمر کو ہمیشہ بولڈ کرداروں میں ہی دیکھا ہے، لگتا ہے وہ بھول جاتی ہیں یہ پاکستانی ڈرامہ ہے، کوئی بالی ووڈ فلم نہیں۔
بعض صارفین نے عثمان مختار پر بھی مایوسی کا اظہار کرتے ہوئے کہا ہمیں ان سے یہ توقع نہیں تھی۔
ڈرامہ پامال زنجبیل عاصم شاہ کی تحریر اور خضر ادریس کی ہدایتکاری میں بنایا گیا ہے، جبکہ اس کی پروڈیوسر تحریم چوہدری ہیں۔
کہانی ایک مصنفہ ملکہ(صبا قمر) کے گرد گھومتی ہے جس نے شادی سے پہلے اور بعد دونوں ادوار میں مشکلات بھری زندگی گزاری ہے۔
اب تک پامال کی 12 اقساط نشر ہو چکی ہیں۔
تازہ قسط میں رضا(عثمان مختار) اور ملکہ (صبا قمر)کے درمیان ہسپتال میں ملاقات کا منظر دکھایا گیا جہاں ملکہ اپنے شوہر کو دیکھ کر جذباتی انداز میں انہیں گلے لگاتی ہے۔
