وزیر اطلاعات سندھ شرجیل میمن نے کہا ہے کہ کے فور، ریڈ لائن و دیگر ترقیاتی منصوبے تعمیراتی سرگرمیاں نہیں سندھ حکومت کا وژن ہیں، حکومت عوامی خدمت کے جذبے سے کام کر رہی، جلد کراچی کے شہری منصوبوں کے مثبت نتائج محسوس کریں گے۔
جاری بیان میں شرجیل میمن نے کہا کہ کراچی میں جاری ترقیاتی منصوبے شہری سہولت، مستقبل کی پائیدار ترقی کیلئے اہم ہوں گے، کے فور منصوبہ عوام سے کیا گیا وہ وعدہ ہے جس کے تحت صاف اور وافر پانی فراہم کیا جائے گا، سندھ حکومت کے تمام ادارے مکمل ہم آہنگی سے کام کر رہے ہیں۔
انہوں نے کہا کہ عزیز بھٹی پارک سے اردو یونیورسٹی تک پانی کی پائپ لائن بچھانے کا مقصد سہولت فراہم کرنا ہے۔
انہوں نے کہا کہ وقتی طور پر ٹریفک کی مشکلات ضرور پیش ہیں مگر یہ مستقل حل کی طرف پیشرفت ہیں، عوام سے اپیل ہے کہ تعاون کریں، یہ منصوبے ان ہی کے بہتر مستقبل کیلئے کئے جا رہے ہیں۔
انہوں نے کہا کہ کے فور، ریڈ لائن اور دیگر ترقیاتی منصوبے تعمیراتی سرگرمیاں نہیں سندھ حکومت کا وژن ہیں۔شرجیل میمن نے کہا کہ ان منصوبوں کا مقصد کراچی کو جدید اور سہولتوں سے آراستہ شہر میں تبدیل کرنا ہے، تمام منصوبوں کی رفتار تیز کی ہے، جہاں بھی عوامی مشکلات ہیں انہیں حل کیا جا رہا ہے۔
انہوں نے کہا کہ سندھ حکومت عوامی خدمت کے جذبے سے کام کر رہی ہے اور بہت جلد کراچی کے شہری ان منصوبوں کے مثبت نتائج خود محسوس کریں گے۔
