نائب وزیراعظم و وزیر خارجہ اسحاق ڈار نے عالمی معاشی مساوات اور موثر نفاذی نظام کو پائیدار ترقی کی ضمانت قرار دیتے ہوئے کہا ہے کہ قرض بحران نے 100سے زائد ممالک کو متاثر کیا، ڈیجیٹل ٹیکنالوجی تک مساوی رسائی ناگزیر ہے۔
اسلام آباد میں مارگلہ ڈائیلاگ 2025ء سے خطاب کرتے ہوئے اسحاق ڈار نے کہا کہ تقریب سے سے خطاب میرے لئے باعث اعزاز ہے، انسانیت کو آج کئی طرح کے چیلنجز درپیش ہیں جن میں سب سے زیادہ بڑا خطرہ موسمیاتی تبدیلی ہے۔
انہوں نے کہا کہ پاکستان کا کاربن اخراج میں حصہ نہ ہونے کے برابر ہے پھر بھی پاکستان موسمیاتی تبدیلی سے شدید متاثرہ ممالک میں شامل ہے۔
اسحاق ڈار نے کہا کہ عالمی تعاون کے بغیر چیلنجز سے نمٹنا ناممکن ہے، سلامتی کونسل عالمی امن واستحکام کی بنیادی ذمہ داری پوری کرنے میں ناکام ہے، عالمی ادارے کمزور ہوتے جارہے ہیں، چیلنجز سے عہدہ برآ ہونے کیلئے کثیرجہتی اداروں کو مضبوط کرنا ضروری ہے۔
انہوں نے کہا کہ عالمی تعاون اور نفاذ کے موثر نظام کے بغیر چیلنجز سے نمٹنا ممکن نہیں، عالمی معاشی مساوات کو فروغ دینا وقت کی ضرورت ہے، اس مکالمے کا موضوع عصر حاضر کے تقاضوں سے انتہائی مطابقت رکھتا ہے۔
انہوں نے کہا کہ ڈیجیٹل ٹیکنالوجی تک سب کیلئے بلاتفریق رسائی ضروری ہے، قرضوں کے بحران نے دنیا کے 100سے زائد ممالک کو منفی طور پر متاثر کیا ہے۔
