ترجمان پاک فوج لیفٹیننٹ جنرل احمد شریف چودھری نے پھر واضح کیاہے کہ پاک فوج دفاع وطن کیلئے پرعزم ہے، کسی بھی بیرونی جارحیت کا جواب سخت اور شدید ہوگا۔
ذرائع کے مطابق ڈی جی آئی ایس پی آر نے ایبٹ آباد میں مختلف جامعات کے اساتذہ اور طلباء کیساتھ نشست کی جس میں حالیہ پاک افغان کشیدگی، ملکی سیکیورٹی صورتحال اور معرکہ حق سمیت اہم موضوعات پر تبادلہ خیال کیا۔
لیفٹیننٹ جنرل احمد شریف چودھری نے بتایا کہ پاکستان نے دہشت گردی اور فتنہ الخوارج کیخلاف موثر اقدامات کئے ہیں، افواج پاکستان دفاع وطن کیلئے پرعزم ہے، کسی بھی بیرونی جارحیت کا جواب سخت اور شدید ہوگا۔
اس موقع پر اساتذہ اور طلباء نے شہدا اور غازیان کو خراج تحسین پیش کیا۔
وائس چانسلر ہزارہ یونیورسٹی ڈاکٹر اکرام اللہ خان نے کہا کہ وطن سے محبت کا صحیح استعارہ پاک فوج ہے، پاک فوج ہمیشہ محاذِ اول پر ہوتی ہے، ہم اس کے شانہ بشانہ کھڑے ہیں۔
اساتذہ نے کہا کہ ہمارے بچوں کے ذہنوں کو گمراہ کرنے کیلئے دشمن عناصر کی سرگرمیاں بڑھ گئی ہیں، ضروری ہے ہم اپنے بچوں کو درست اور مصدقہ معلومات فراہم کریں جبکہ طلباء نے کہا کہ ہمیں فخر ہے کہ ہم اس ملک کے شہری ہیں جہاں افواجِ پاکستان جیسے ادارے نوجوانوں کو حوصلہ اور رہنمائی فراہم کرتے ہیں، آج ہمیں سوشل میڈیا پر پاک فوج کے خلاف پھیلائی جانے والی غلط افواہوں کے بارے میں درست معلومات حاصل ہوئیں، ہمارے ذہنوں میں ملکی وصوبائی حالات اور پاک فوج بارے پیدا شدہ ابہام دور ہوگئے ہیں ۔
