وزیراعلی خیبرپختونخوا سہیل آفریدی نے کہا ہے کہ آئین سب کیلئے برابر ہے، ہم ایک ریاست دو دستور کا کلچر ختم کرنے آئے ہیں، طاقتوروں اور ناانصافی کرنے والوں کو بھی انصاف کے کٹہرے میں لائیں گے۔
وزیر اعلی ہائوس میں شمولیتی تقریب سے خطاب کرتے ہوئے سہیل آفریدی نے کہا ہے کہ ہماری جدوجہد حقیقی آزادی اور قانون کی بالادستی کی تحریک ہے جس میں وکلا برادری کا مرکزی کردار ہے، صوبے کی بار ایسوسی ایشنز کیلئے 42 کروڑ روپے کے گرانٹس منظور ہو چکی ہیں جو چند دنوں میں فراہم کردی جائیگی۔
انہوں نے کہا کہ ہم ایک ریاست دو دستور کا کلچر ختم کرنے آئے ہیں،ہم نے آئین اور قانون کو مکڑی کا جالا نہیں بننے دینا جس میں کمزور پھنس جائے اور طاقتور نکل جائے، آئین اور قانون سب کیلئے برابر ہے، ہم نے طاقتور اور ناانصافی کرنے والوں کو بھی انصاف کے کٹہرے میں لانا ہے۔
انہوں نے کہا کہ میری بانی سے ملاقات کرانے کے عدالتی احکامات کو ردی کی ٹوکری میں پھینک دیا گیا، ہماری جدوجہد عدلیہ کی آزادی، آئین کی بالادستی، قانون کی حکمرانی اور میڈیا کی آزادی کیلئے ہے۔
انہوں نے کہا کہ بانی پی ٹی آئی کے وژن کے مطابق عوامی مسائل حل کرنے کی بھرپور کوشش کریں گے ۔
