وزیراعلی بلوچستان میر سرفراز بگٹی نے اقلیتوں کی سماجی و معاشی ترقی کیلئے ‘پیپلز مینارٹی کارڈ’ کے اجراء کا اعلان کرتے ہوئے کہا ہے کہ اقلیتوں کے حقوق کا تحفظ اور بہبود حکومت کی اولین ترجیح ہے، کارڈ کے ذریعے صحت، تعلیم، روزگار اور کاروباری سہولتیں فراہم کی جائینگی۔
منگل کو وزیراعلی بلوچستان سرفراز بگٹی نے اقلیتوں سے متعلق مشاورتی نشست کا انعقاد کیا جس میں پارلیمانی سیکرٹری اقلیتی امور سنجے کمار، چیف سیکرٹری بلوچستان شکیل قادر خان، پرنسپل سیکرٹری سمیت متعلقہ حکام شریک ہوئے۔
اجلاس میں بلوچستان میں اقلیتوں کی سماجی و معاشی ترقی کیلئے پیپلز مینارٹی کارڈکے اجرا کا فیصلہ کیا گیا، پروگرام کے موثر نفاذ کیلئے رواں مالی سال مینارٹی انڈومنٹ فنڈ کیلئے 50کروڑ روپے مختص کئے گئے۔
اجلاس سے خطاب کرتے ہوئے وزیراعلی سرفراز بگٹی نے کہا کہ آئندہ مالی سال مینارٹی انڈومنٹ فنڈکے تحت پروگرام کا بجٹ ایک ارب روپے تک بڑھایا جائے گا، پیپلز مینارٹی کارڈ کے ذریعے اقلیتوں کو صحت، تعلیم، روزگار اور کاروبار میں سہولتیں فراہم کی جائیں گی۔
انہوں نے کہا کہ اقلیتوں کے حقوق کا تحفظ اور بہبود حکومت کی اولین ترجیح ہے، پروگرام کے تحت اقلیتی برادری کیلئے معاونت کے منصوبے شروع کئے جائیں گے۔
انہوں نے کہا کہ پیپلز مینارٹی کارڈ بلوچستان میں سماجی مساوات اور بین المذاہب ہم آہنگی کے فروغ کا عملی مظہر ثابت ہوگا، اقلیتوں کی ترقی و خوشحالی سے صوبے کی مجموعی سماجی ہم آہنگی مزید مستحکم ہوگی۔
انہوں نے کہا کہ مینارٹی انڈومنٹ فنڈ کے شفاف اور موثر استعمال کیلئے جدید ڈیجیٹل مانیٹرنگ نظام متعارف کرایا جائے گا، اقلیتی رہنمائوں کی مشاورت سے پروگرام کی تفصیلات کو حتمی شکل دی جا رہی ہے۔
