وزیراعظم شہباز شریف نے صنعتوں اور کسانوں کیلئے رعایتی بجلی پیکیج کا اعلان کرتے ہوئے کہا ہے کہ ملکی صنعتوں، زرعی شعبے کی خطے میں مسابقت بڑھانے، کاروباری سہولتوں میں اضافے کیلئے اقدامات جاری ہیں، صنعت و زراعت کے شعبے ترقی سے ملک کو قرضوں سے نجات ملے گی۔
جمعرات کو صنعتی و زرعی شعبے کے ماہرین و کاروباری برادری کے وفد نے وزیراعظم سے ملاقات کی۔
وزیراعظم نے گفتگو کرتے ہوئے کہا کہ اللہ کے فضل و کرم سے بہتر پالیسیوں کی بدولت معاشی اشارے بہتر ہوئے، مگر ہم سب کو مل کر ابھی مزید محنت کرنی ہے۔ انہوں نے کہا کہ معاشی بحران سے معاشی استحکام کا سفر کٹھن ضرور تھا لیکن معاشی ٹیم کی محنت اور آپ سب کے تعاون سے یہ ممکن ہوا جس کی بدولت صنعتوں کا پہیہ چلا، برآمدات میں اضافہ ہوا، روزگار کے مواقع پیدا ہوئے۔
انہوں نے کہا کہ گزشتہ برس موسم سرما میں دیئے جانے والے پیکیج کے تحت صنعتی و زرعی شعبے نے 410گیگاواٹ اضافی بجلی استعمال کی، ملکی معیشت کی ترقی، روزگار میں اضافے کیلئے صنعت اور زراعت کی ترقی انتہائی ضروری ہے۔
انہوں نے کہا کہ ملکی صنعتوں، زرعی شعبے کی خطے میں مسابقت بڑھانے اور کاروباری سہولتوں میں اضافے کیلئے اقدامات کر رہے ہیں۔اس موقع پر وزیراعظم نے صنعتوں اور کسانوں کیلئے رعایتی بجلی کے پیکیج کا اعلان کیا جس کے تحت صنعتوں، کسانوں کو آئندہ 3سالوں (نومبر 2025ء سے اکتوبر 2028ء )میں رعایتی قیمت پر اضافی بجلی فراہم کی جائے گی۔
