گورنر خیبرپختونخوا فیصل کریم کنڈی نے امید ظاہر کی ہے کہ وزیراعلی سہیل آفریدی خیبرپختونخوا میں بہتری لائینگے، حکومت کو جلد اندازہ ہو جائیگا علی امین نے کہاں غلطیاں کیں؟، سابق وزیراعلی کے جانے کی جتنی خوشی پی ٹی آئی کو ہے اتنی اپوزیشن کو نہیں، جلد یہ یوم نجات منائینگے۔
نجی ٹی وی سے گفتگو کرتے ہوئے فیصل کریم کنڈی نے کہا کہ علی امین گنڈاپور غیرسیاسی و غیرسنجیدہ شخصیت تھے، وہ خود چاہتے تھے وفاق کیساتھ حالات خراب ہوں، وہ کبھی گورنر ہائوس سے نکالنے کی بات کرتے تھے تو کبھی کہتے بلاول بھٹو کو خیبرپختونخوا نہیں آنے دوں گا۔
انہوں نے کہا کہ عہدہ ملنے پر عاجزی اختیار کرنی چاہئے،بڑی بڑی باتیں نہیں کرنی چاہئیں، ، علی امین کے جانے پر جتنی خوشی پی ٹی آئی میں ہے، اتنی اپوزیشن میں نہیں، بہت جلد پی ٹی آئی یوم نجات منائے گی۔
انہوں نے کہا کہ صوبے میں قیام امن کیلئے اگر وزیراعلی جرگہ بنا رہے ہیں تو یہ خوش آئند اقدام ہے، سہیل آفریدی کو سب سے پہلے پارلیمنٹ کو اعتماد میں لینا چاہئے، وہ جرگہ تشکیل دے کر ہر ضلع کا دورہ کریں۔ انہوں نے کہا کہ جرگے میں اپوزیشن سمیت تمام سیاسی جماعتوں کو شامل کیا جائے، جہاں وزیراعلی کو گورنر ہائوس یا اپوزیشن کی مدد درکار ہوگی، مثبت رسپانس دیں گے۔
انہوں نے کہا کہ حکومت کو خود دیکھنا چاہئے علی امین کے کون سے فیصلے غلط تھے،حکومت کو جلد اندازہ ہو جائے گا کہ علی امین نے کہاں غلطیاں کیں؟، سہیل آفریدی کو بریفنگ دی جا رہی ہے، چند دنوں میں سب واضح ہو جائے گا، امید ہے وہ بہتری لائیں گے۔
