صدر مملکت آصف زرداری نے ہندو برادری کو دیوالی کی مبارکباد دیتے ہوئے کہا ہے کہ دیوالی امن، رواداری اور ہم آہنگی کی علامت ہے، تعلیم، تجارت اور عوامی خدمت میں ہندو برادری کی خدمات قابل تحسین ہیں،ایسا معاشرہ تشکیل دینا ہوگا جہاں سب مذاہب کے لوگ وقار واحترام سے رہیں۔
دیوالی کے موقع پر جاری بیان میںصدر مملکت نے کہا کہ دیوالی روشنی کے اندھیرے پر اور نیکی کے بدی پر غلبے کی علامت ہے ،دیوالی کا یہ تہوار امن، رواداری، ہمدردی اور ہم آہنگی جیسی آفاقی اقدار کی یاد دہانی کراتا ہے ، یہ اقدار ہمارے قومی تشخص کا حصہ ہیں اور اسلام کے باہمی احترام و بقائے باہمی کے اصولوں کی عکاسی کرتی ہیں ۔
انہوں نے کہا کہ آئین پاکستان تمام شہریوں کو مساوی حقوق اور مذہبی آزادی کی مکمل ضمانت دیتا ہے،قائداعظم محمد علی جناح نے ایسے پاکستان کا تصور پیش کیا تھا جہاں اقلیتوں کو مساوی حقوق اور مواقع حاصل ہوں۔
انہوں نے کہا کہ ہمیں ایسا معاشرہ قائم رکھنا ہوگاجہاں تمام مذاہب کے ماننے والے عزت، وقار اور احترام کے ساتھ رہ سکیں۔
صدر مملکت نے تعلیم، تجارت اور عوامی خدمت کے شعبوں میں ہندو برادری کی خدمات کو قابل تحسین قرار دیتے ہوئے کہا کہ ہندو برادری پاکستان کے سماجی، ثقافتی اور معاشی ڈھانچے کا ایک اہم حصہ ہے۔
