وزیراعظم کے مشیر برائے سیاسی امور سینیٹر رانا ثناء اللہ نے واضح کیا ہے کہ پاکستان امن کا خواہاں ہے، حملہ ہوا تو ادھار رکھے بغیر بھرپور جواب دیا جائے گا، کسی بھی سیاسی ومذہبی جماعت پر پابندی کے حق میں نہیں، بدقسمتی سے جب بھی مذہبی جماعت کا احتجاج ہوا بات ہلاکتوں پر آ کر رکی۔
لاہور میں میڈیا سے گفتگو کرتے ہوئے راناء ثناء اللہ نے کہا کہ نذیر سواتی مسلم لیگ (ن) کے فائونڈر ممبر اور نواز شریف کے قریبی ساتھی تھے ان سے میرا تعلق بڑے بھائیوں جیسا تھا۔
انہوں نے کہا کہ پنجاب میں بلدیاتی انتخابات ہر صورت ہوں گے، وزیر اعلی مریم نواز نے مکمل تیاری کرلی ہے، وہ چاہتی ہیں گلی محلے تک یہ نظام پہنچے اور عوام اپنا کردار ادا کریں۔
ایک سوال پر انہوں نے کہا کہ ہم نے ہمیشہ افغانستان کا ساتھ دیا، مگر افسوس اس سے ہمیشہ تکلیف ہی ملتی ہے، ہم اپنے جوانوں و پیاروں کے مزید جنازے نہیں اٹھا سکتے، واضح کہہ دیا ہے اب دہشت گردوں اور لوگوں میں فرق واضح ہونا چاہئے۔
انہوں نے کہا کہ ہماری پالیسی بڑی واضح ہے کہ پاکستان کسی ہمسایہ ملک کے ساتھ ہے کہ ہم کسی پر حملہ آور نہیں ہوں گے، اگر کوئی ہمارے اوپر حملہ کرے گا اس کا ادھار نہیں رکھیں گے، اب شائدسکور زیرو سکس سے زیادہ ہو۔
انہوں نے کہاکہ ہم چاہتے ہیں بیٹھ کر معاملات حل کریں، معاملات ٹیبل پر حل ہوتے ہیں۔ انہوں نے کہا کہ کسی بھی سیاسی یا مذہبی جماعت پر پابندی لگانا ہماری پالیسی نہیں لیکن بدقسمتی سے کچھ واقعات ہوئے ، اس جماعت نے جب بھی احتجاجی پروگرام دیا اتنا تشدد ہوا کہ بات ہلاکتوں پر آ کر رکتی ہے۔
انہوں نے بتایا کہ پنجاب حکومت نے پابندی کا فیصلہ وفاق کو بھیج دیا ہے ، اب وفاقی حکومت اس پر فیصلہ کرے گی۔
