لاہور: گلوکار احمد جہانزیب نے کہا ہے کہ گلوکاری آسان کام نہیں، اس کے لیے برسوں کی محنت اور ریاضت درکار ہوتی ہے، آواز کا بھی خاص خیال رکھنا پڑتا ہے۔
نجی ٹی وی پروگرام میں گفتگو کرتے ہوئے انہوں نے کہا کہ میرے مشہور گانے جیسے کہو ایک دن، خدا اور محبت اور دیگر سبھی گیت اپنی شاعری کی خوبصورتی کی وجہ سے دلوں میں اتر گئے، کیونکہ شاعری کا گانے پر گہرا اثر ہوتا ہے۔
انہوں نے کہا کہ بہترین اوریجنل ساونڈ ٹریک کا ایوارڈ حاصل کرنے پر بہت خوش ہوں، اس ایوارڈ کو حاصل کرنے میں مجھے 25 سال لگے ہیں۔
انہوں نے کہا کہ عشق مرشد کا گانا پہلے سے نہیں لکھا گیا تھا بلکہ میںنے ہدایت کار فاروق رند کو تجویز دی تھی کہ بلال عباس اور درفشاں کی پہلی ملاقات کے منظر کے دوران ایک نیا گانا پس منظر میں ہونا چاہیے، اسی لیے میں نے راتوں رات نیا گانا لکھا جو سب کو پسند آگیا۔
گانے سے متعلق تنازع پر بات کرتے ہوئے انہوں نے وضاحت کی کہ یہ گانا میں نے خود لکھا تھا، تاہم میں اکثر شاعری کے دوران اپنے اردگرد موجود افراد سے مشورہ ضرور لیتا ہوں کہ کوئی لائن مناسب ہے یا نہیں، لیکن اس مشورے سے کسی دوسرے کو کریڈٹ نہیں ملتا اور گانے پر میں نے تنہا محنت کی تھی۔
