وزیراعظم شہباز شریف نے موسمیاتی تبدیلی جیسے چیلنجز سے نمٹنے کیلئے عالمی سطح پر مشترکہ و موثر اقدامات ناگزیر قرار دیتے ہوئے کہا ہے کہ زرعی شعبے کی ترقی اور کسانوں کی فلاح و بہبود حکومت کی اولین ترجیحات میں شامل ہے۔
عالمی یوم خوراک پر جاری بیان میں وزیراعظم نے کہا کہ پاکستان اقوام عالم کیساتھ ہم آواز ہو کر دنیا بھر کے انسانوں کیلئے خوراک جیسی بنیادی ضرورت کی فراہمی کی اہمیت کو اجاگر کرتا ہے، خوراک کی فراہمی کو یقینی بنانے کیلئے نہ صرف ملکی بلکہ عالمی سطح پر ضروری اقدامات اٹھانا ناگزیر ہیں، دہائیوں سے عالمی سطح پر یہ دن اس تناظر میں منایا جاتا ہے کہ بنی نوع انسان کی فلاح و بہبود اور انسانی بقاء کیلئے متوازن اور غذائیت سے بھرپور خوراک کی فراہمی کے لیے مشترکہ اقدامات اور موثر حکمت عملی بنائی جا سکے۔
انہوں نے کہا کہ عالمی یوم خوراک اس سال بہتر مستقبل اور بہتر خوراک کیلئے مشترکہ کاوشیںہاتھوں میں ہاتھ کے عنوان سے منایا جا رہا ہے،یہ عنوان نہ صرف بین الاقوامی سطح پر ممالک کے درمیان بلکہ تمام طبقات بشمول کسان، عوام، حکومتی نمائندگان اور حکومتی اداروں کے درمیان وافر، مناسب اور غذائیت سے بھرپور خوراک کی عوام تک باآسانی رسائی اور فراہمی میں باہمی تعاون کو اجاگر کرتا ہے۔
وزیراعظم نے کہا کہ زرعی شعبے کی ترقی و خوشحالی اور کسان کی فلاح و بہبود حکومت پاکستان کی اولین ترجیحات میں شامل ہے، کسی بھی ملک میں غذائی قلت کیخاتمہ اور غذائی پیداوار کیتحفظ میں پہلا قدم کسان کی خوشحالی، معاشی آسودگی اور پیشہ وارانہ استعداد کار میں اضافہ کا ہے۔
انہوں نے کہا کہ فصلوں کے پیداواری معیار و تخفظ اور زرعی پیداوار کی بروقت ترسیل کو یقینی بنانے کے لیے وفاقی، صوبائی حکومتیں اور تمام متعلقہ ادارے جامع اور موثر حکمت عملی پر کام کر رہے ہیں۔
وزیر اعظم نے کہا کہ پاکستان کو جن مشکلات کا سامنا ہے ان میں موسمیاتی تبدیلی کے باعث فصلوں کی غیر یقینی پیداوار اور موسمیاتی تغیرات کے باعث بیش قیمت فصلوں کینقصانات شامل ہیں، یہ نقصانات خوراک کی قلت اور کسانوں کے لیے معاشی مسائل کا باعث بنتے ہیں۔وزیراعظم نے کہا کہ پاکستان اپنے دستیاب ذرائع کو بھرپور طریقہ سے بروئے کار لاتے ہوئے موسمیاتی تبدیلی کے اثرات سے نبٹنے کیلئے لائحہ عمل ترتیب دے رہا ہے تاہم موسمیاتی تغیر کی وسیع پیمانے اور ہنگامی نقصانات سے بچنے کیلئے عالمی سطح پر ممالک کے درمیان مشترکہ اور موثر کاوشوں کی ضرورت ہے۔
انہوں نے کہا کہ حالیہ سیلاب کے پیش نظر پاکستان میں فصلوں کی پیداوار کو خاصہ نقصان پہنچا ہے جو کہ بلاشبہ زرعی پیداوار اور خوراک کی فراہمی کو متاثر کرے گا، اس نقصان کا ازالہ کرنے کے لیے حکومت یکسو ہے۔
وزیر اعظم نے کہا کہ آئیے آج کے دن بحیثیت قوم، حکومت اور عوام یک زبان ہو کر اس بات کا عہد کریں کہ ہم نے موسمیاتی تبدیلی جیسے چیلنجز کا مل کر مقابلہ ،ملکی زرعی پیداوار کے تحفظ، غذائی قلت کے خاتمے ،تمام اہل وطن کیلئے خوراک کی مناسب، متوازن اور معیاری فراہمی یقینی بنانے کیلئے اپنے حصے کا بھرپور کام کرنا ہے۔
