وزیراعلی پنجاب مریم نواز نے دیہی خواتین کو پنجاب کی زرخیز زمین، آباد گھروں اور مضبوط معیشت کی بنیاد قرار دیتے ہوئے کہا ہے کہ دیہی خواتین سمیت ہر عورت کا تحفظ ریڈ لائن ہے، سمجھوتہ نہیں کیا جائے گا۔
دیہی خواتین کے عالمی دن پر جاری بیان میں مریم نواز نے کہا کہ اس دن کو منانے کا مقصد دیہی خواتین کی محنت، جدوجہد اور خدمات کو سراہنا ہے۔
انہوں نے کہا کہ پنجاب کی دیہی خواتین محنت، محبت، احساسِ ذمہ داری اور قربانی کی بہترین مثال ہیں، جن کی بدولت صوبے کی زمین زرخیز ہوتی ہے، گھر آباد رہتے ہیں اور ملک کی معیشت مضبوط ہوتی ہے۔
مریم نواز نے کہا کہ دیہی عورت صرف محنت کش نہیں بلکہ پنجاب کی ترقی میں ایک فعال کردار ادا کر رہی ہے۔ انہوں نے واضح کیا کہ دیہی خواتین سمیت ہر عورت کا تحفظ ان کی ریڈ لائن ہے۔
انہوں نے کہا کہ چاہتی ہوں کہ دیہی خواتین صرف کسان نہ رہیں بلکہ فیصلہ سازی اور معیشت میں موثر کردار ادا کریں۔
وزیراعلی نے بتایا کہ حکومت پنجاب دیہی خواتین کیلئے نئے مواقع اور سہولیات فراہم کر رہی ہے، جن میں کسان کارڈ، لائیوسٹاک کارڈ اور ہمت کارڈ شامل ہیں۔ انہوں نے کہا کہ بنیادی مراکز صحت کو اپ گریڈ کیا جا رہا ہے، جبکہ بلاسود قرضے، لیپ ٹاپ اور تعلیمی اسکالرشپس سے دیہی بیٹیوں کی زندگیوں میں مثبت تبدیلی آرہی ہے۔
وزیر اعلی نے کہا کہ ورچوئل پولیس اسٹیشن خواتین کے حقوق کے تحفظ کو یقینی بنا رہا ہے جبکہ سکل ڈویلپمنٹ پروگرامز اور مویشیوں کی فراہمی کے ذریعے خواتین کو روزگار کے مواقع دیئے جا رہے ہیں ۔
