ملتان: قائم مقام صدر یوسف رضا گیلانی نے کہا ہے کہ سیلاب متاثرین کی گھروں کو واپسی تک چین سے نہیں بیٹھیں گے، حکومت مشکل سے تنہاء نہیں نمٹ سکتی، فلاحی اداروں کا کردار قابل تحسین ہے، کارکنان ،سول سوسائٹی سیلاب زدگان کی بحالی پر توجہ مرکوز رکھیں۔
جاری بیان کے مطابق ہفتے کوملتان میں متاثرین کو خوراک اور بنیادی ضروریات کی اشیا کی تقسیم بارے منعقدہ تقریب سے خطاب کرتے ہوئے یوسف رضا گیلانی نے کہا کہ اس وقت پورے ملک کو سیلاب نے لپیٹ رکھا ہے،لوگوں کی زمینیں ،گھر، جانور اور کاروبار ختم ہو گئے، مشکل کی گھڑی میں ہم سیلاب زدگان کیساتھ ہیں اور ساتھ کھڑے رہیں گے۔
انہوں نے کہا کہ جن لوگوں کا جانی یا مالی نقصان ہوا ان کے غم میں برابر کے شریک ہیں، یقین دلاتا ہوں کہ ان کی گھروں کو واپسی تک چین سے نہیں بیٹھیں گے۔ انہوں نے فارمرز ڈویلپمنٹ آرگنائزیشن اور پاکستان پاورٹی ایوی ایشن کے کردار کی تعریف کرتے ہوئے کہا کہ تنہاء حکومت اس مشکل سے نہیں نمٹ سکتی، فلاحی اداروں کا کردار قابل تحسین ہے جنہوں نے مصیبت زدہ اور مشکل میں پھنسے لوگوں کے ساتھ تعاون کیا اور ان کے کھانے پینے اور ضروریات کا خیال رکھا۔
انہوں نے کہا کہ پیپلز پارٹی نے بھی ہر مشکل وقت میں اپنے لوگوں کا ساتھ دیا،اس وقت تمام کارکنان، پارٹی رہنمائوں، سول سوسائٹی، اداروں اور وفاقی و صوبائی حکومتوں کا فوکس سیلاب زدگان کی بحالی ہے۔ انہوں نے پاکستان سویٹ ہومز اور مختار اے شیخ کی جانب سے متاثرین کیلئے کی جانیوالی خدمات کی تعریف کرتے ہوئے کہا کہ صحت، خوراک، تعلیم اور رہائش کے حوالے سے تمام ادارے متحرک ہیں اور اچھا کردار ادا کر رہے ہیں۔
یوسف رضا گیلانی نے کہا کہ ہم جو کچھ ہیں علاقے کے عوام کی دعائوں سے ہیں،عوام نے ہمیشہ ہمارا ساتھ دیا ،اس لئے ہمارا بھی فرض ہے کہ عوام کا ساتھ دیں۔ انہوں نے مخیر حضرات،تاجروں اور صنعتکاروں سے اپیل ہے کہ متاثرین کی مزید خدمت کیلئے آگے بڑھیں۔
انہوں نے کہا کہ اراکین قومی اسمبلی سید عبدالقادر گیلانی اور سید علی قاسم گیلانی روزانہ کی بنیاد پر متاثرین کے پاس ان کے مسائل دریافت کرنے جاتے ہیں،باقی ذمہ دار بھی امداد اور بحالی کے حوالے سے ضرور کردار ادا کریں۔
