اسلام آباد: وزیر توانائی اویس لغاری نے کہا ہے کہ صارفین پر بوجھ کم کرنے کیلئے بجلی شعبے میں اصلاحات ناگزیر ہیں، عوام کو سستی بجلی کی فراہمی کیلئے مسابقتی مارکیٹ کے قیام کا وقت آگیا ہے، بجلی کی پیداوار، تجارت و ترسیل کو نئے دور میں داخل کریں گے، سی ٹی بی سی ایم اور وہیلنگ آکشن سے صنعتوں کے اخراجات کم ہوں گے، شعبہ براہِ راست سپلائر سے بجلی خرید سکے گا۔
ٹی بی ایم ایم ورکشاپ سے ورچوئل خطاب میں اویس احمد لغاری نے کہا ہے کہ ہم جدید، شفاف اور مسابقتی بجلی کی مارکیٹ قائم کرنے کیلئے پرعزم ہیں تاکہ ہر پاکستانی کو سستی، قابل اعتماد اور پائیدار توانائی فراہم کی جا سکے۔
انہوں نے کہا کہ بجلی کی پیداوار، تجارت اور ترسیل کو ایک نئے دور میں داخل کیا جائے گا،سی ٹی بی سی ایم عالمی تجربات کی روشنی میں تیارکردہ نظام ہے، یہ نظام بجلی شعبے میں شفافیت، مسابقت کے فروغ کیلئے ڈیزائن کیا گیا ہے، یہ کوئی تجربہ نہیں بلکہ برسوں سے تیار کردہ اصلاحاتی منصوبہ ہے جسے اب عملی جامہ پہنانے کا وقت آ گیا ہے۔
انہوں نے کہا کہ ہمارا آکشن فریم ورک سی ٹی بی سی ایم کے نفاذ کا بنیادی ستون ہے، اس کے تحت 800 میگاواٹ وہیلنگ ڈیمانڈ مسابقتی عمل سے الاٹ کی جائے گی، خاص طور پر بڑے صنعتی صارفین اس وہیلنگ انتظام سے فائدہ اٹھا سکیں گے، صنعتی صارفین براہِ راست سپلائر سے مسابقتی نرخوں پر بجلی خرید سکیں گے۔
انہوں نے کہا کہ وزیر توانائی نے کہا کہ سی ٹی بی سی ایم اور وہیلنگ آکشن سے صنعتوں کے اخراجات کم ہوں گے، قابل تجدید توانائی کے ذرائع کو نظام میں شامل کرنے میں سہولت ملے گی، برآمدی شعبوں کو سستی اور ماحول دوست بجلی تک رسائی حاصل ہوگی، یہ اصلاح اوپر سے مسلط نہیں کی جا رہی بلکہ شراکتی فریم ورک ہے، اصلاحات کے بغیر نااہلیاں برقرار رہیں گی اور صارفین پر بوجھ میں اضافہ ہوتا رہے گا۔
