پشاور: مشیر اطلاعات خیبرپختونخوا بیرسٹر سیف نے کہا ہے کہ خیبرپختونخوا کی قربانیوں کی وجہ سے ملک دہشت گردی سے محفوظ ہے ، وفاق بات چیت کیلئے جلد افغانستان وفد بھیجے ،یا ہمیں جانے کی اجازت دے۔
جاری بیان میں بیرسٹر سیف نے کہا کہ دہشت گردی کا سارا بوجھ خیبر پختونخواحکومت نے اٹھایا ہوا ہے، خیبرپختونخوا کی قربانیوں کی وجہ سے باقی ملک دہشت گردی کی آگ سے محفوظ ہے، وفاقی حکومت ہوش کے ناخن لے اور مسئلے کو سنجیدگی سے دیکھے۔
انہوں نے کہا کہ ہر چیز پر سیاست نہیں کی جا سکتی، افغانستان کو نظر انداز کرنا وفاقی حکومت کی بڑی غلطی ہے۔ انہوں نے کہا کہ یہ انسانی زندگیوں کا معاملہ ہے، اگر دہشت گردی کی آگ خیبر پختونخوا سے باہر پھیلی تو پورا ملک اس کی لپیٹ میں آجائے گا۔
انہوں نے کہا کہ وفاق یا تو خود افغانستان کیساتھ بات چیت کیلئے وفد بھیجے یا خیبر پختونخوا کو اجازت دے، ہمارا جرگہ تیار ہے۔
