اسلام آباد: پاکستان اور ایران نے قطر کیساتھ اظہار یکجہتی کرتے ہوئے تیزی سے بدلتی علاقائی صورتحال کے تناظر میں رابطے میں رہنے پر اتفاق کیا ہے جبکہ وزیراعظم شہباز شریف نے کہا ہے کہ پاکستان ایران کیساتھ باہمی دلچسپی کے تمام شعبوں میں تعلقات کو مزید فروغ دینا چاہتا ہے۔
جاری بیان کے مطابق عرب اسلامی سربراہی اجلاس کے موقع پر وزیراعظم نے ایرانی صدر ڈاکٹر مسعود پزشکیان سے ملاقات کی۔ اس موقع پر نائب وزیراعظم و وزیر خارجہ سینیٹر محمد اسحاق ڈار، چیف آف آرمی اسٹاف فیلڈ مارشل سید عاصم منیر، وزیر دفاع خواجہ محمد آصف اور وزیر اطلاعات و نشریات عطا اللہ تارڑ بھی موجود تھے۔
ملاقات میں 9 ستمبر کو قطر پر اسرائیلی جارحیت کی شدید مذمت کی گئی۔ دونوں رہنماؤں نے قطر کیساتھ یکجہتی و حمایت کا اظہار کیا اور اسرائیلی جارحیت کے مقابلے میں امت مسلمہ کے اتحاد پر زور دیا۔دونوں رہنماؤں نے تیزی سے بدلتی علاقائی صورتحال کے تناظر میں رابطے میں رہنے پر اتفاق کیا۔
وزیراعظم نے کہا کہ دوحہ عرب اسلامی سربراہی اجلاس نے مسلم دنیا کی طرف سے مضبوط و یکجہتی پر مبنی پیغام دیا ہے کہ اسرائیل کی جارحیت اب مزید برداشت نہیں کی جا سکتی۔ وزیراعظم نے ایرانی سپریم لیڈر آیت اللہ علی خامنہ ای کیلئے دلی عقیدت اور نیک خواہشات پہنچاتے ہوئے کہا کہ پاکستان ایران کے ساتھ باہمی دلچسپی کے تمام شعبوں میں تعلقات کو مزید فروغ دینا چاہتا ہے۔
اس موقع پر ایرانی صدر پزشکیان نے فلسطین کے مسئلے پر پاکستان کے موقف کو سراہا اور قریبی تعاون جاری رکھنے اور تعلقات مزید مستحکم بنانے کی خواہش کا اظہار کیا۔
