لاہور: بانی پی ٹی آئی کی ہمشیرہ علیمہ خان نے کہاہے کہ عمران خان کے موقف پر قائم ہیں، پوری فیملی کو بھی اٹھا لیں تو پروا ہ نہیں، شیر افضل مروت کو عمران خان نکال چکے، کسی اور جماعت میں جائیں۔اے ٹی سی لاہور کے باہر میڈیا سے گفتگو کرتے ہوئے علیمہ خان نے کہا کہ بچوں کی ضمانت منظور ی خوشی کی بات ہے تاہم انہیں جیسا اٹھایا گیاو ہ افسوسناک ہے۔
انہوں نے کہا کہ عمران خان نے کہا تھا کہ آپ چاہے میری پوری فیملی کو اٹھالیں لیکن میں اپنے موقف سے پیچھے نہیں ہٹوں گا، ہم بھی عمران خان کے ساتھ کھڑے ہیں۔ انہوں نے سوال اٹھایا کہ کلبھوشن کے ملٹری ٹرائل کا کیا بنا جس نے ہزاروں پاکستانیوں کو شہید کیا ہے۔
انہوں نے کہا کہ ہمارے تو بزرگوں کے بھی خفیہ ٹرائل کئے گئے، حسان سمیت دیگر کارکنان کو سزائیں دیں، حسان خان کو اپیل کا حق بھی نہیں دیا گیا۔ ایک سوال پر انہوں نے کہا کہ عمران خان اب صرف القادر ٹرسٹ میں گرفتار ہیں،اسلام آباد ہائیکورٹ کے چیف جسٹس کو عمران خان کی اپیل نہ سننے پر مستقل چیف جسٹس بنا دیا گیا، ان کو کل کو جواب دینا ہو گا۔
شیر افضل مروت بارے سوال کے جواب میں علیمہ خان نے کہا کہ ایسے بندوں کو ایجنسیاں استعمال کر کے چھوڑ دیتی ہیں پھر ان کو کوئی پوچھتا نہیں تو ان کا یہی حال ہو جاتا ہے۔ انہوں نے کہا کہ شیر افضل مروت کو عمران خان نے پہلے ہی پارٹی سے نکال دیا ہے، اب وہ کسی اور جماعت میں شمولیت اختیار کرلیں۔
