پشاور: وزیراعلی خیبرپختونخوا علی امین گنڈاپور نے سیلاب متاثرین کو معاوضوں کی ادائیگی، بحالی کا عمل تیز کرنے کی ہدایت کرتے ہوئے حکم دیا ہے کہ متاثرہ انفراسٹرکچر کی بحالی کی نگرانی ڈپٹی کمشنرز خود کریں، سیلاب متاثرہ علاقوں میں وبائی امراض کے ممکنہ پھیلائو کو روکنے کیلئے فوری اقدامات اٹھائے جائیں۔
پیر کو وزیراعلی علی امین گنڈاپور کی زیر صدارت سیلاب متاثرہ اضلاع کے حوالے سے ویڈیو لنک اجلاس ہوا جس میں مشیر خزانہ، چیف سیکرٹری، ایڈیشنل چیف سیکرٹری داخلہ، سیکرٹری ریلیف، ڈی جی پی ڈی ایم اے اور متاثرہ اضلاع کے ڈپٹی کمشنرز شریک ہوئے۔
اجلاس میں بارشوں اور سیلابوں سے متاثرہ علاقوں میں ریلیف اور بحالی کے کاموں پر پیشرفت کا جائزہ لیا گیا۔اجلاس کو بتایا گیا ہے کہ حالیہ سیلابوں میں 411 افراد جاں بحق ہوئے جن میں سے 352کے لواحقین کو معاوضوں کی مد میں ادائیگی مکمل کر دی گئی ہے۔
شرکاء کو بتایا گیا کہ جاں بحق افراد کے لواحقین میں اب تک 704ملین روپے تقسیم کئے جا چکے ہیں، اسی طرح 132زخمیوں میں سے 60کو معاوضوں کی مد میں 30ملین روپے ادا کئے گئے ہیں۔ اجلاس کو بتایا گیا کہ متاثرہ گھروں کا ڈیٹا اکٹھا کرلیا گیا ہے، 571مکمل تباہ شدہ گھروں میں سے 367کے مالکان کو اور 1983ء جزوی متاثرہ گھروں میں سے 1094کے مالکان کو معاوضے دیئے جا چکے ہیں، مجموعی طور پر گھروں کے نقصانات کی مد میں 595ملین روپے ادا کئے گئے ہیں جبکہ باقی ماندہ معاوضوں کی ادائیگی آئندہ دو روز میں مکمل کی جائے گی، متاثرہ خاندانوں میں اب تک 29ہزار 631 فوڈ پیکیجز بھی تقسیم کئے جا چکے ہیں۔
اس موقع پر وزیراعلی نے معاوضوں کی ادائیگی کے فوری بعد بحالی کے عمل کا آغاز کرنے کی ہدایت کرتے ہوئے حکم دیا کہ متاثرہ انفراسٹرکچر کی بحالی کے لئے ڈپٹی کمشنرز خود نگرانی کریں۔
انہوں نے کہا کہ پی سی ون دفاتر میں بیٹھ کر نہیں بلکہ فیلڈ میں جا کر تیار کئے جائیں جبکہ دریائوں اور آبی گزرگاہوں کی ڈیسلٹنگ اور حفاظتی پشتوں کی تعمیر کیلئے ایک بڑا ون ٹائم منصوبہ شروع کیا جائے گا۔وزیراعلی نے ہدایت کی کہ ڈپٹی کمشنرز اپنے اضلاع میں گزشتہ 40برس کے دوران پانی کی مقدار کا ریکارڈ مرتب کریں اور آبی گزرگاہوں اور نالوں کے اطراف سے تجاوزات ہٹانے کے لئے بلا امتیاز کارروائی کریں۔
وزیراعلی نے سول انتظامیہ کی حالیہ کارکردگی کو سراہتے ہوئے کہا کہ ہنگامی صورتحال میں جس طرح فوری رسپانس دیا گیا اس کی ملک کی تاریخ میں مثال نہیں ملتی، بحالی کے مرحلے میں بھی اسی جذبے کے ساتھ کام کیا جائے۔
وزیراعلی نے حکم دیا کہ تباہ شدہ سکولوں اور صحت مراکز کیلئے پری فیب سٹرکچرز لگایا جائے جبکہ وبائی امراض کے ممکنہ پھیلا کو روکنے کیلئے فوری اقدامات اٹھائے جائیں۔
