اسلام آباد: صدر آصف زرداری نے سید علی گیلانی کو خراج عقیدت پیش کرتے ہوئے کہا ہے کہ مرحوم کی زندگی قربانی، ثابت قدمی کی علامت ہے، بھارتی ظلم وستم بھی ان کے عزم وجرات کو متزلزل نہیں کرسکا۔
سید علی گیلانی کی چوتھی برسی پر جاری بیان میں صدر مملکت نے کہا کہ مرحوم کی زندگی قربانی اور ثابت قدمی کی علامت ہے، ان کی ذات حق و انصاف پر یقین رکھنے والوں کیلئے مشعل راہ ہے۔
انہوں نے کہا کہ بھارتی ظلم و ستم سید علی گیلانی کے عزم اور جرات کو متزلزل نہ کر سکا، ان کے موقف نے کشمیری عوام کو آزادی کی جدوجہد پر ثابت قدم رکھا،پاکستان سید علی گیلانی اور کشمیری عوام کی قربانیوں کو خراجِ تحسین پیش کرتا ہے۔
صدرمملکت نے کہا کہ سید علی گیلانی کا لہو تحریک آزادی کو ہمیشہ زندہ رکھے گا اور پاکستان کشمیری عوام کا مقدمہ ہر فورم پر اٹھاتا رہے گا،بھارتی جبر کشمیری عوام کے حوصلے پست نہیں کر سکتا۔
انہوں نے کہا کہ کشمیری عوام کو اقوامِ متحدہ کی قراردادوں کے مطابق حق خودارادیت ملنا چاہئے۔ صدر مملکت نے کہا کہ دعاء ہے کہ اللہ مرحوم کے درجات بلند فرمائے۔
