لاہور: وزیراعلی پنجاب مریم نواز نے عوامی ضروریات کو مدنظر رکھ کر بہاولپور میں چلڈرن ہسپتال کے قیام کی منظوری دیتے ہوئے منصوبے کا تفصیلی پلان طلب کرلیا۔
پیر کو وزیراعلی مریم نواز سے ڈپٹی سپیکر پنجاب اسمبلی ملک ظہیر اقبال چنڑ نے ملاقات کی جس میں صوبے کی مجموعی سیاسی صورتحال، جنوبی پنجاب میں جاری ترقیاتی منصوبوں اور عوامی فلاحی اقدامات پر تفصیلی تبادلہ خیال کیا گیا۔ ملاقات میں ڈپٹی سپیکر نے پنجاب میں سڑکوں کی تعمیر و بحالی کے اقدامات پر وزیراعلی کو خراج تحسین پیش کرتے ہوئے کہا کہ مریم نواز کی قیادت میں صوبہ ترقی کی نئی راہوں پر گامزن ہے۔
انہوں نے بہاولپور میں برن سنٹر کے قیام پر وزیراعلی کا شکریہ ادا کرتے ہوئے کہا کہ جنوبی پنجاب کے عوام کو صحت کی بنیادی سہولتیں ان کی دہلیز پر فراہمی قابل تحسین قدم ہے۔انہوں نے فیلڈ ہسپتال، کلینک آن ویل اور مریم نواز ہیلتھ کلینک پراجیکٹ جیسے عوام دوست منصوبوں کو سراہتے ہوئے پنجاب کی صحت سہولیات میں انقلابی تبدیلی قرار دیا۔
ڈپٹی سپیکر نے کہا کہ پنجاب ڈویلپمنٹ پروگرام کے تحت تمام شہروں کی یکساں ترقی کا وژن گیم چینجر ہے ۔ انہوںنے ایئر ایمبولنس سروس، فیلڈ ہسپتالز کے قیام اور تجاوزات کے خاتمے کیلئے کئے جانیوالے اقدامات کو قابل ستائش قرار دیا۔
ملک ظہیر اقبال چنڑ نے کہا کہ مریم نواز کی قیادت میں پنجاب حقیقی ترقی کی راہ پر گامزن ہے ،عوام دوست فیصلے حکومت کا طرہ امتیاز ہیں۔
اس موقع پر وزیراعلی نے عوامی ضروریات کو مدنظر رکھتے ہوئے بہاولپور میں چلڈرن ہسپتال کے قیام کی اصولی منظوری دی جسے سول ہسپتال کے قریب تعمیر کرنے پر اتفاق کیا گیا، وزیراعلی نے منصوبے کا تفصیلی پلان طلب کرتے ہوئے کہا کہ پنجاب کی ترقی میرے دل کے بے حد قریب ہے،جنوبی پنجاب کو ترقی کے مرکزی دھارے میں لانا حکومت کی اولین ترجیح ہے ۔
