پشاور: وفاقی وزیر امور کشمیرو گلگت بلتستان انجینئر امیر مقام نے کشمیریوں کے حق خودارادیت، پاکستان کیساتھ الحاق کے فیصلے کی بھرپور حمایت کا اعادہ کرتے ہوئے کہا ہے کہ کشمیری عوام کو یقین دلاتے ہیں پاکستان کبھی ان کے کاز سے پیچھے نہیں ہٹے گا۔
یومِ الحاق پاکستان پر جاری بیان میں امیر مقام نے کہا کہ 19جولائی 1947ء کا دن ریاست جموں و کشمیر کی تاریخ میں فیصلہ کن موڑ تھا جب ایک متفقہ قرارداد کے ذریعے پاکستان کیساتھ الحاق کا فیصلہ کیا گیا جو مذہبی، ثقافتی اور جغرافیائی وابستگیوں پر مبنی تھا۔
انہوں نے کہا کہ پاکستان نے بھارت کیساتھ تین جنگیں لڑنے کے باوجود ہمیشہ جموں و کشمیر تنازعے کے پرامن حل کیلئے اقوام متحدہ کی سلامتی کونسل قراردادوں کے مطابق اپنا اصولی موقف برقرار رکھا۔ انہوں نے کہا کہ جموں و کشمیر پر دہائیوں سے جاری بھارتی فوجی قبضہ کشمیری عوام کے بنیادی حقوق کی کھلی خلاف ورزی ہے۔
انہوں نے کہا کہ بھارت کے ظلم و جبر اور انسانی حقوق کی مسلسل پامالیوں نے کشمیریوں کے جذبے کو کمزور نہیں کیا بلکہ ان کے اس عزم کو مزید مضبوط کیا ہے کہ وہ پاکستان کے ساتھ شامل ہونا چاہتے ہیں۔
انہوں نے اس عزم کا اعادہ کیا کہ پاکستان حق خودارادیت کے حصول تک کشمیری عوام کی اخلاقی، سیاسی اور سفارتی حمایت کرتا رہے گا۔ انہوں نے کہا کہ ہم کشمیری عوام کو یقین دلاتے ہیں کہ پاکستان کبھی ان کے کاز سے پیچھے نہیں ہٹے گا۔
