اسلام آباد: صدرمملکت آصف علی زرداری اور وزیراعظم شہباز شریف نے یوم شہدائے کشمیر کے موقع پر کشمیری شہدا کو خراج تحسین پیش کرتے ہوئے کہا ہے کہ پاکستان کشمیری بھائیوں کی سیاسی، اخلاقی اور سفارتی حمایت اس وقت تک جاری رکھے گا،عالمی برادری مقبوضہ کشمیر میں جاری بھارتی ریاستی دہشت گردی کا فوری نوٹس لے۔
اتوار کو ایوان صدر سے جاری بیان کے مطابق صدرمملکت آصف علی زرداری نے یوم شہدائے کشمیر کے موقع پر اپنے پیغام میں کہا کہ یومِ شہدائے کشمیر کے موقع پر ان 22 عظیم کشمیری شہدا کو خراجِ عقیدت پیش کرتا ہوں جنہوں نے 13 جولائی 1931 کو سرینگر جیل کے باہر ظلم و جبر کے خلاف اور حقِ آزادی کی خاطر اپنی جانوں کا نذرانہ پیش کیا،آج کشمیری عوام جس عظیم جدوجہد کو آگے بڑھا رہے ہیں، وہ انہی 22 شہدا کی قربانیوں کا تسلسل ہے۔
انہوںنے کہا کہ ان کی جاں نثاری نے کشمیری قوم کے دلوں میں آزادی کی جو شمع جلائی، وہ آج بھی روشن ہے۔صدر مملکت نے کہا کہ پاکستان کشمیری عوام کی بہادری، عزم اور قربانیوں کو خراجِ تحسین پیش کرتا ہے، جو دہائیوں سے بھارتی تسلط کے خلاف ڈٹ کر کھڑے ہیں اور اپنی آزادی کے لیے جدوجہد جاری رکھے ہوئے ہیں۔
آصف علی زرداری نے کہا کہ بھارت کے غیر قانونی زیر تسلط مقبوضہ جموں و کشمیر کو ایک عسکری قید خانہ بنا دیا گیا ہے جہاں ماورائے عدالت قتل، جبری گمشدگیاں، سیاسی قید، آبادی کا تناسب تبدیل کرنے کی کوششیں اور مسلمانوں کی شناخت مٹانے کی منظم سازشیں جاری ہیں۔
صدر مملکت نے کہا کہ میں عالمی برادری، انسانی حقوق کی تنظیموں سے اپیل کرتا ہوں کہ وہ مقبوضہ کشمیر میں جاری بھارتی ریاستی دہشت گردی اور انسانی حقوق کی سنگین خلاف ورزیوں کا فوری نوٹس لیں۔انہوں نے کہا کہ پاکستان کشمیری بھائیوں کی سیاسی، اخلاقی اور سفارتی حمایت اس وقت تک جاری رکھے گا جب تک کہ انہیں اقوامِ متحدہ کی سلامتی کونسل کی قراردادوں کے مطابق حقِ خودارادیت حاصل نہیں ہو جاتا۔
دوسری طرف وزیراعظم شہبازشریف کا کہنا ہے کہ آج کا دن کشمیریوں کے استقامت، مزاحمت اورغیر متزلزل عزم کی یاد دلاتا ہے۔وزیراعظم شہبازشریف نے یوم شہدائے کشمیر پر خصوصی پیغام میں کہا کہ کشمیری عوام جائز جدوجہد کے لئے پہلے کی طرح آج بھی جانیں قربان دے رہے ہیں۔
ہم تمام کشمیری شہدا کی بہادری اورعزم کو سلام پیش کرتے ہیں۔شہبازشریف نے کہا کہ حکومت پاکستان کشمیریوں کی سیاسی، سفارتی اوراخلاقی حمایت کا اعادہ کرتی ہے۔ مسئلہ کشمیر اقوام متحدہ کی قراردادوں اور کشمیریوں کی مرضی سے حل ہونا چاہیئے۔واضح رہے کہ یوم شہدائے کشمیر آج منایا جارہا ہے۔
مقبوضہ کشمیر، پاکستان اوردنیا بھرمیں رہنے والے کشمیری بھارت کے انسانیت سوز مظالم کے خلاف احتجاج کریں گے۔کشمیرمیڈیا سروس کے مطابق مقبوضہ جموں و کشمیرمیں مکمل ہڑتال ہے۔ کل جماعتی حریت کانفرنس کی کال پرشہدا قبرستان کی جانب مارچ کیا جائے گا۔ شہدا کو خراج عقیدت پیش کرنے کیلئے سرینگراوردیگرعلاقوں میں پوسٹرز لگادیئے گئے۔
