اسلام آباد: نائب صدر پیپلز پارٹی شیری رحمن نے صدر زرداری کو پارلیمانی نظام کا محافظ، آئینی تسلسل کا ضامن قرار دیتے ہوئے
استعفے کی خبروں کو گمراہ کن قرار دے دیا۔ جاری بیان میں شیری رحمن نے کہا کہ صدر مملکت کے استعفے کی افواہیں منظم سازش کے تحت جمہوری ڈھانچے کو کمزور کرنے کی کوشش ہیں، عوام ان جعلی خبروں، افواہوں اور منفی پراپیگنڈے کا حصہ نہ بنیں۔انہوں نے کہا کہ صدر زرداری نے ہر نازک وقت میں جمہوریت کا پرچم بلند رکھا، وہ جمہوری استحکام کی علامت اور آئینی اقدار کے سچے نگہبان ہیں، صدر نے اپنی مرضی اور سیاسی بصیرت سے تمام اختیارات پارلیمان کو منتقل کئے۔
انہوں نے کہا کہ صدرمملکت اتحادی حکومت کے توازن اور استحکام کا سب سے اہم ستون ہیں، آج بھی وہ پارلیمانی نظام کے اصل محافظ اور آئینی تسلسل کے ضامن ہیں، صدر زرداری کی موجودگی آئین، پارلیمان اور جمہوری ادارے محفوظ رہنے کی ضمانت ہے۔
