اسلام آباد(شِنہوا)چائنہ سٹیٹ کنسٹرکشن انجینئرنگ کارپوریشن لمیٹڈ(سی ایس سی ای سی) کی پاکستان شاخ نے اسلام آباد میں بچوں کے فلاحی مرکز کو سامان عطیہ کیا ہے۔ یہ سامان عالمی یوم اطفال اور مرکز کے قیام کی دوسری سالگرہ کے موقع پر منعقد کی گئی تقریب میں عطیہ کیا گیا۔
یہ عطیہ اسلام آباد چائنہ-پاکستان یوتھ ون ہارٹ سٹیپ اینڈ کیور ہوم(آئی سی او ایس ایچ) کو دیا گیا۔ یہ غیر منافع بخش فلاحی مرکز ہے جو دور دراز کے علاقوں سے علاج کے لئے آنے والے غریب بچوں اور مریضوں کو مفت رہائش، خوراک، طبی امداد اور تعلیمی سہولیات فراہم کرتا ہے۔
عطیہ کئے گئے سامان میں تعلیمی مواد، کھیلوں کا سامان، خوراک، کپڑے اور گھریلو اشیاء شامل تھیں جس کا مقصد مرکز میں رہائش پذیر بچوں کی زندگی اور سیکھنے کے ماحول کو بہتر بنانا تھا۔
سی ایس سی ای سی کے چیف ایگزیکٹو آفیسر وانگ یاؤ دونگ نے تقریب میں گفتگو کرتے ہوئے بنیادی شہری سہولیات کی ترقی کے ساتھ ساتھ سماجی ذمہ داریوں کے لئے کمپنی کے دیرینہ عزم پر زور دیا۔
وانگ نے کہا کہ یہ اشیاء بظاہر قیمت میں معمولی ہوسکتی ہیں لیکن یہ ہمارے عملے کی پاکستانی بچوں کے لئے گہری ہمدردی اور محبت کو ظاہر کرتی ہیں۔
چین کے سفارت خانے کے منسٹر قونصلر یانگ گوانگ یوآن نے بھی تقریب میں شرکت کی اور آئی سی او ایس ایچ کو عوامی سطح پر تعاون کی قابل تقلید مثال قرار دیا۔
یانگ نے کہا کہ محبت کی کوئی سرحد نہیں ہوتی۔ چینی اداروں اور آئی سی او ایس ایچ کے درمیان بڑھتا ہوا تعاون ظاہر کرتا ہے کہ ہمدردی کے بیج کیسے مضبوط درخت کی شکل اختیار کرسکتے ہیں۔
