اسلام آباد: وفاقی وزیر داخلہ محسن نقوی نے ایک بار پھر امریکی سفیر پر واضح کیا ہے کہ پاکستان اپنی سلامتی پر ہرگز آنچ نہیں آنے دے گا، پورا خطہ جنگ کے دہانے پر ہے، خطرناک صورتحال کا تمام ترذمہ دار بھارت ہے۔ذرائع کے مطابق پاک بھارت کشیدگی کے پیش نظر قائم مقام امریکی سفیر نیٹلی بیکر نے 48 گھنٹے میں دوسری بار وزیر داخلہ محسن نقوی سے ملاقات کی اس موقع پر امریکہ کے پولیٹیکل قونصلر زیک ہارکن رائیڈر بھی موجود تھے۔
ملاقات میں سرحدوں کی تازہ ترین صورتحال پر تبادلہ خیال کیا گیا۔ ذرائع کے مطابق وزیرداخلہ نے امریکی سفیر کو موجودہ کشیدگی اور بھارتی جارحیت سے پیدا صورتحال سے آگاہ کیا اور بھارتی ڈورنز کی دہشتگردی بارے بریف کیا۔وزیر داخلہ نے کہا کہ اس وقت پورا خطہ جنگ کے دہانے پر ہے ،خطرناک صورتحال کا تمام تر ذمہ دار بھارت ہے۔
انہوں نے کہا کہ بھارت نے تمام بین الاقوامی قوانین کو پامال کرکے شہری آبادیوں کو ڈورنز کے ذریعے نشانہ بنانے کی مذموم کوشش کی جبکہ پاکستان نے مو ثر کارروائی کر کے درجنوں ڈرونز کو مار گرایا ۔ انہوں نے کہا کہ پاکستان اپنی سلامتی پر ہر گز آنچ نہیں آنے دے گا۔
