اسلام آباد: وزیراعظم شہباز شریف نے ازبکستان طے پائے معاہدوں پر فوری عملدرآمد یقینی بنانے کی ہدایت کرتے ہوئے دو طرفہ تجارتی حجم 2 ارب ڈالر تک بڑھانے کیلئے روڈ میپ وضع کرنے کی ضرورت پر زور دیا ہے۔ جمعرات کو وزیر اعظم شہباز شریف سے ازبکستان کے سفیر علیشیر تختائیف نے ملاقات کی ،وزیر اعظم نے صدر شوکت مرزیوئیف کیلئے نیک خواہشات کا اظہار کیا اور گزشتہ ماہ تاشقند دورے کے دوران بہترین مہمان نوازی کیلئے تہہ دل سے شکریہ ادا کیا۔
وزیراعظم نے اپنے دورے کے دوران دونوں ممالک کے مابین دوطرفہ تعلقات پر ہونیوالی شاندار پیشرفت پر اطمینان کا اظہار کیا جس میں اعلی سطحی اسٹریٹجک تعاون کونسل کی تشکیل کیساتھ مختلف شعبوں میں اہم معاہدوں و مفاہمتی یادداشتوں پر دستخط شامل ہیں۔
وزیراعظم نے کہا کہ تاشقند سے واپسی پر متعلقہ شعبوں کے وزراء کو ذمہ داری سونپی ہے کہ وہ دورے کے دوران ہوئے فیصلوں پر فوری عمل درآمد کو یقینی بنائیں۔وزیراعظم نے خاص طور پر کان کنی اور معدنیات، ریلوے (بشمول ٹرانس افغان ریلوے پروجیکٹ)،سپیشل اکنامک زونز، بینکنگ، سیاحت، ثقافت اور قابل تجدید توانائی میں ازبکستان کیساتھ تعاون بڑھانے میں پاکستان کی دلچسپی پر روشنی ڈالی۔
وزیراعظم نے دوطرفہ تجارت کو 2ارب ڈالر تک بڑھانے کیلئے ایک روڈ میپ وضع کرنے کی ضرورت پر بھی زور دیا جس پر دورے کے دوران دونوں رہنماؤں کے مابین اتفاق ہواتھا۔اس موقع پر ازبک سفیر نے وزیر اعظم کی نیک خواہشات پر شکریہ ادا کرتے ہوئے کہا کہ صدر شوکت مرزیوئیف پاکستان کیساتھ ازبکستان کے تعلقات کو مضبوط بنانے اور دونوں ممالک کے درمیان بہترین سیاسی تعلقات کو باہمی طور پر مفید اقتصادی تعلقات میں تبدیل کرنے کیلئے پرعزم ہیں۔
انہوں نے کہا کہ صدر مرزیوئف نے رواں برس کے آخر میں پاکستان کا سرکاری دورہ کرنے کی وزیر اعظم کی دعوت قبول کر لی ہے جس کیلئے دونوں فریقین کے درمیان تاریخوں پر اتفاق کیا جار ہا ہے۔
