اسلام آباد: وزیراعظم شہباز شریف نے افغانستان میں انسداد دہشتگردی کوششوں میں پاکستان کا کردار تسلیم کرنے پر امریکی صدر ٹرمپ سے اظہار تشکر کرتے ہوئے کہا ہے کہ پاکستان خطے میں امن کیلئے امریکہ کیساتھ قریبی شراکت داری جاری رکھے گا۔
سوشل میڈیا سائٹ پر جاری بیان میں وزیراعظم شہباز شریف نے کہا کہ امریکی صدر ڈونلڈ ٹرمپ کی جانب سے افغانستان میں انسداد دہشت گردی کوششوں میں پاکستان کے کردار اور حمایت کو تسلیم کرنے اور سراہنے پر ان کا شکریہ ادا کرتے ہیں۔
انہوں نے کہا کہ پاکستان ہمیشہ انسداد دہشت گردی کی کوششوں میں ایک کلیدی کردار ادا کرتا رہا ہے تاکہ دہشت گردوں اور شدت پسند گروہوں کو محفوظ پناہ گاہوں سے محروم کیا جا سکے اور کسی بھی ملک کے خلاف ان کی کارروائیوں کو روکا جا سکے۔
انہوں نے کہا کہ پاکستان دہشت گردی کے خاتمے کیلئے اپنی جدوجہد میں ثابت قدم اور پرعزم ہے ،اس مقصد کیلئے 80 ہزار سے زائد بہادر فوجیوں اور شہریوں نے جانوں کا نذرانہ دیا ہے۔ انہوں نے کہا کہ پاکستان کی قیادت اور عوام کا عزم غیر متزلزل ہے ، ہم ملک سے دہشت گردی کے خاتمے کیلئے ہر ممکن اقدامات جاری رکھے جائیں گے۔
انہوں نے کہا کہ خطے میں امن و استحکام کے قیام کیلئے پاکستان کی امریکہ کیساتھ قریبی شراکت داری جاری رہے گی۔
