اسلام آباد: رہنماء پی ٹی آئی سلمان اکرم راجہ نے کہا ہے کہ سب جانتے ہیں فارم 47پر کون جیتا، شیر افضل مروت کے بیان پر تبصرہ نہیں کروں گا ، عدالتی صورتحال آئیڈیل نہیں، جھوٹ فریب ومکر کی حکومت میں پرویز خٹک جیسے لوگ ہی مشیر لگیں گے۔
اسلام آباد ہائی کورٹ کے باہر میڈیا سے گفتگو کرتے ہوئے سلمان اکرم راجہ نے کہا کہ بانی پی ٹی آئی سے ملاقاتیں نہیں کروائی جاتیں جبکہ عمران خان کی ہفتہ وار 2ملاقاتیں آئینی حق ہے اور اس بارے عدالتی حکم بھی موجود ہے۔
انہوں نے کہا کہ الٹا ہمارے لوگوں کو گرفتار کرنے کی کوششیں کی جاتی ہیں۔انہوں نے کہا کہ فارم 47پر شیرافضل مروت کے بیان پر میں تبصرہ نہیں کروں گا، شیر افضل مروت کی پارٹی ممبر شپ کا فیصلہ بانی پی ٹی آئی ہی کریں گے، سب کو پتا ہے فارم 47پر کون جیتا ہے ؟۔
انہوں نے کہا کہ حکومت سے تو الیکشن سے متعلق رپورٹ اور صحافی برداشت نہیں ہورہے ، سرور باری کے گھر اور دفتر پر حملہ ہوا، یہ دور جھوٹے بیانئے کا ہے، جبر کا موسم ہے ، ہم اس جبر کے خلاف لڑتے رہیں گے۔انہوں نے جھوٹ فریب و مکر کی حکومت میں پرویز خٹک جیسے لوگ ہی مشیر لگیں گے ،26نومبر کے حوالے سے ہمارے پاس بہت مواد موجود ہے لیکن اس وقت کچھ آئیڈیل عدالتی صورتحال بھی نہیں، لہٰذا حکمت عملی سے آگے بڑھ رہے ہیں۔
