اسلام آباد: وزیراعظم شہباز شریف نے یوٹیلیٹی سٹورز کے بغیر رمضان پیکیج لانے کا اعلان کرتے ہوئے کہا ہے کہ زرعی ٹیکس وقت کا تقاضا ہے، چاروں صوبوں نے وفاق کیساتھ مل کر ذمہ داری کا مظاہرہ کیا ، مہنگائی میں کمی خوش آئند،اشیائے خورونوش کے نرخوں میں کمی سے عام آدمی کو ریلیف مل رہا ہے، تیل درآمد پر ایک سال کیلئے 1.2ارب ڈالر موخر ادائیگی کی سہولت فراہمی پر سعودی عرب کے شکر گزارہیں، پاکستان معاشی استحکام کے بعد اب معاشی ترقی کی راہ پر گامزن ہے،ملک وقوم کیلئے قربانیاں دینے والے قوم کے ہیروز ہیں، افواج پاکستان اور عوام دہشتگردی کے ناسور کے مکمل خاتمے کیلئے شانہ بشانہ ہیں۔
منگل کو وفاقی کابینہ اجلاس سے گفتگو کرتے ہوئے وزیراعظم شہباز شریف نے کہا کہ ملک سے پولیو کے خاتمے کیلئے ہر ممکن اقدامات کر رہے ہیں،ملک بھر میں انسداد پولیو مہم شروع ہے، گزشتہ روز جمرود میں پولیو ٹیم پر حملہ افسوسناک ہے۔
انہوں نے کہا کہ ملک میں حالیہ دہشتگردی کے واقعات مذمت کرتے ہیں، سیکیورٹی فورسز نے بہادری سے لڑتے ہوئے 23خوارج کو جہنم واصل کیا جبکہ خوارج سے لڑتے ہوئے 18 جوان جام شہادت نوش کر گئے۔ انہوںنے بتایا کہ بلوچستان میں دہشت گردوں سے لڑتے ہوئے زخمی سیکیورٹی اہلکاروں کی عیادت کی، ان کے حوصلے بلند تھے۔
انہوںنے کہا کہ جوانوں کے ملک کی خاطر قربانی کے جذبے اور غیر متزلزل عزم کی پوری قوم معترف ہے، ملک وقوم کیلئے قربانیاں دینے والے قوم کے ہیروز ہیں، افواج پاکستان اور عوام دہشتگردی کے ناسور کے مکمل خاتمے کیلئے شانہ بشانہ ہیں۔
انہوںنے کہا کہ نئے سال کے آغاز پر مہنگائی کی شرح مزید کم ہوئی، جنوری 2025ء میں مہنگائی 9سال کی کم ترین سطح پر ریکارڈ ہونے کا خیرمقدم کرتے ہیں، سال 2024ء کے آغاز میں مہنگائی کی شرح 28.73فیصد تھی، دسمبر 2024ء میں مہنگائی 4.1فیصد تک کم ہوئی، جنوری 2025ء میں مہنگائی کی شرح مزید کم ہو کر 2.5فیصد پر آ چکی ہے۔
وزیراعظم نے کہا کہ مہنگائی کی شرح کا بتدریج کم ہونا خوش آئند ہے، اشیائے خورونوش کے نرخوں میں کمی سے عام آدمی کو ریلیف مل رہا ہے، پاکستان معاشی استحکام کے بعد اب معاشی ترقی کی راہ پر گامزن ہے۔انہوںنے کہا کہ رمضان کی آمد آمد ہے، وزارت فوڈ سکیورٹی کو ذمہ داری دی ہے رواں سال ماہ صیام میں یوٹیلیٹی سٹور کے بغیر رمضان پیکیج لائیں گے تاکہ کرپشن نہ ہو۔
انہوں نے کہا کہ اب یہ معاملہ یوٹیلیٹی سٹورز کیساتھ نہیں چل سکتا، پچھلے رمضان میں بے پناہ شکایات تھیں، اب چند یوٹیلیٹی سٹورز ہی رمضان پیکیج لائیں گے۔انہوں نے کہا کہ (آج) یوم یکجہتی کشمیر قومی جذبے کیساتھ منایا جائے گا، پورا پاکستان مقبوضہ کشمیر کے ساتھ اظہار یکجہتی کرے گا، آزادی کی تحریک میں ہم کشمیری بھائیوں کے ساتھ ہیں۔
انہوں نے کہا کہ سعودی عرب پاکستان کا برادر ملک ہے، سعودی عرب کے خصوصی وفد نے پاکستان کا دورہ کیا، سعودی عرب نے تیل درآمد پر ایک سال کیلئے 1.2ارب ڈالر موخر ادائیگی کی سہولت فراہم کی جس پر اس کے مشکور ہیں۔
انہوں نے بتایا کہ سعودی فنڈ سے مانسہرہ میں واٹر سپلائی سکیم کیلئے 4کروڑ 10لاکھ ڈالر کے منصوبے پر دستخط ہوئے، پاکستان اور سعودی فنڈ فار ڈویلپمنٹ کے درمیان مختلف شعبوں میں سمجھوتے خوش آئند ہیں۔انہوں نے بتایا کہ زرعی ٹیکس صوبہ سندھ اور بلوچستان نے منظور کر لیا ہے، زرعی ٹیکس وقت کا تقاضا ہے جس کا دائرہ کار صوبوں تک پھیلایا جائے گا، چاروں صوبوں نے وفاق کے ساتھ ذمہ داری کا مظاہرہ کیا اور فیصلے کئے۔
