اسلام آباد: صدر آصف زرداری نے ون چائنہ پالیسی کی حمایت جاری رکھنے کے پاکستانی عزم کا اعادہ کرتے ہوئے کہا ہے کہ دونوں ممالک کے درمیان سدا بہار سٹرٹیجک تعاون کی شراکت داری ہے، دوطرفہ تعاون مضبوط،دوستی کا بندھن آگے بڑھانے کیلئے بیجنگ میں چینی صدر سے تبادلہ خیال کا منتظر ہوں۔
صدر آصف زرداری نے چینی سال نو اور موسم بہار کے تہوار کے موقع پر چینی ہم منصب شی جن پھنگ کو مبارکباد پیش کرتے ہوئے خط لکھا ہے ۔صدر مملکت نے خط میں پاکستان اور چین کے مابین ‘آہنی دوستی’مضبوط بنانے کے عزم کا اعادہ کرتے ہوئے کہا ہے کہ دوطرفہ تعاون مضبوط بنانے اور دوستی کے بندھن کو آگے بڑھانے کیلئے بیجنگ میں چینی صدر سے تبادلہ خیال کا منتظر ہوں۔
انہوں نے کہا ہے کہ ون چائنہ پالیسی پاکستان کی خارجہ پالیسی کا اہم حصہ ہے،پاکستان ون چائنہ پالیسی کی حمایت جاری رکھے گا ۔ انہوں نے کہا کہ دونوں ممالک کے درمیان سدا بہار تزویراتی تعاون کی شراکت داری ہے، دونوں ممالک کی قیادت کی پے در پے نسلوں کی انتھک کوششوں نے بین الریاستی تعلقات کے اس منفرد اور مثالی بندھن کو پروان چڑھایا اور مضبوط کیا۔
صدر مملکت نے پاک چین تعلقات اور پاک چین اقتصادی راہداری کو آگے بڑھانے میں چینی صدر کی بصیرت انگیز قیادت کا شکریہ ادا کرتے ہوئے کہا کہ چین نے سال 2024ء میں مختلف شعبوں میں نمایاں پیش رفت کی۔
صدر زرداری نے خط میں پاکستان اور چین کے درمیان پائیدار و مسلسل بڑھتی ہوئی دوستی کو سراہا اور صدر شی جن پھنگ کی صحت، چینی عوام کی مسلسل ترقی اور خوشحالی کیلئے نیک خواہشات کا اظہار کیا۔
