راولپنڈی: چیئرمین پی ٹی آئی بیرسٹر گوہر نے واضح کیا ہے کہ مذاکرات ہوئے تو چھپ کر نہیں کھل کر کریں گے، خیبرپختونخوا میں کرپشن کیخلاف زیرو ٹالرنس ہے، بانی نے کہا ہے کہ کرپشن برداشت نہیں کی جائیگی ، خیبرپختونخوا میں نیا صدر علی امین کی مرضی سے تعینات کیا گیا ، پھیلائی جانیوالی معلومات قابل مذمت ہیں۔
اڈیالہ جیل کے باہر صحافیوںسے گفتگو کرتے ہوئے بیرسٹر گوہر نے کہا کہ ہماری ایک ہی مذاکراتی کمیٹی بنی تھی اورایک ہی جگہ مذاکرات ہو رہے تھے ،ہم فراغ دلی سے ان کیساتھ بیٹھے تھے لیکن بدقسمتی سے وہ مذاکرات آگے نہیں بڑھ سکے، پی ٹی آئی 27سال سے انصاف اور قانون کی حکمرانی کیلئے جدوجہد کر رہی ہے۔
انہوں نے کہا کہ ہم آزاد عدلیہ اور پارلیمان کے ساتھ 26ویں ترمیم کیخلاف باقی حزب اختلاف کی جماعتوں سے ملیں گے، عدالتوں میں جانے سمیت ہر قسم کی جدوجہد اور احتجاج کریں گے۔
ایک سوا ل پر انہوں نے کہا کہ بانی پی ٹی آئی نے واضح کہا ہے کہ لوگ علی امین گنڈاپور کو ہٹانے بارے غلط فہمیاں پھیلا رہے ہیں، عمران خان نے کہا ہے کہ مجھے علی امین کا پیغام آیا تھا کہ مجھ پر کام کا بہت دباؤ ہے، نیند تک پوری نہیں ہورہی۔
بیرسٹر گوہرنے کہا کہ بانی نے کہا ہے کہ خیبرپختونخوا کا نیا صدر علی امین گنڈا پور کی مرضی سے مقرر کیا گیاہے، اس بارے پھیلائی جانیوالی غلط معلومات قابل مذمت ہیں۔ ایک سوال پر انہوں نے بتایا کہ پی ٹی آئی میں کرپشن کے خلاف زیرو ٹالرنس ہے، بانی نے کہا کہ خیبر پختونخواہ میں کسی قسم کی کرپشن برداشت نہیں کی جائے گی۔بیرسٹر گوہر نے کہا کہ اگر ہماری کہیں بھی بیٹھک ہوگی تو انشااللہ تعالی سب کو بتائیں گے، ہم مذاکرات چھپ کر نہیں کریں گے کھل کر کریں گے ، ہمارے یہی مذاکرات ہیں جو ختم ہو چکے ہیں۔
